Broodjies vir as die kooklus op strike is

Ons probeer Skoorlief se jong seun betrek by kokery, met groot sukses.  Behalwe dat sy gunsteling maaksel, ’sousies’ is.  Die lewe bestaan nie net uit sousies nie, so ons push die boundaries so bietjie.

Gisteraand was dit dus sy beurt om kos te maak, wat hy met oorgawe aangepak het!

Neem ‘n groot blik, of 2 klein blikkies tuna in water.  In water, want as ek ekstra olie wil inneem, doen ek dit via die olyfolie- of druiwepit oliebottel.  Nie die olie waarin die vis dryf nie!

Dreineer en skep uit in ‘n bakkie, en roer ‘n teelepel mrs. Balls by, asook ‘n groot lepel of twee van jou gunsteling mayo.  Kirts ‘n paar draaie swartpeper in, en meng deur.

Rooster 2 snye volgraanbrood per persoon, en sit op ‘n bakplaat.  Skep hompies tuna op elke broodjie, en sorg dat die hoekies ook tuna kry. 

My ouma het altyd gese as jy brood smeer en die botter kom tot teen die kante, jy ‘n goeie stiefma sal wees.  Nou toe nou, ek is nou nie regtig ‘n stiefma nie, maar ‘n ekstra ma wat stoutighede het om ‘n kind te leer, is meer in die kol…  en bietjie van kosmaak, hopelik.

Rasper, of sny kaas bo-oor die tuna, gevolg deur ‘n skeutjie paprika (dis net vir die grandgeit, niks essensiele waarde hier nie) en bietjie gedroogte oreganum.

Druk onder die oondrooster tot die kaas lekker gesmelt is, en sit voor met ‘n slaai en lekker warm koppie tee.