Ek het ouma se soetkoekie resep loop soek, en ek deel dit graag met jou en joune. Moet my net nie vra waar die vet vandaan moet kom nie – hier in die Kaap kan ek varkvet opspoor, maar ek weet nie van ander sagte vet nie. Maar hey, ons is in Afrika, miskien is dit al in die koelkaste, en ek weet dit net nie. Ek sou seg mens moet maar die vet ook met margarine vervang.
Ouma se Outydse Soetkoekies
2 koppies suiker
1/2 koppie botter of margarine
1/2 koppie sagte vet
2 eiers
1/2 teelepel sout
1 1/2 teelepels koeksoda
2 teelepels kremetart
1 teelepel fyn naeltjies
2 teelepels fyn kaneel
1 teelepel gerasperde lemoenskil
1/2 tot 2/3 koppie water of SOETWYN (my soort koek hierdie…)
Sif die droe bestanddele, en gooi suiker by.
Vryf die botter en die vet met die vingers in die meelmengsel.
Klits die eiers, en voeg 2 eetlepels van die vloeistof by. Voeg dit by die droe mengsel, tesame met die lemoenskil, en meng tot ‘n sagte deeg. Onthou, nou kan jy meer vloeistof byvoeg. Knie dit goed en laat dit vir ten minste ‘n uur staan.
Neem ‘n deel van die deeg, rol dit uit – so 5mm in dikte. Druk met ‘n koekiedrukker uit – doop die koekiedrukker in meel, anders gaan jy begin lelik praat. En gebruik verskillende vorms – dis mos prettigheid in aanvang.
Sit die koekies met ‘n mes op ‘n bakplaat, so 2.5cm uitmekaar.
Bak vir so 15 minute by 400 grade Farenheit/200 grade Celcius. Lig van die bakplaat af met ‘n mes, en koel af op draadrak.
Daar het jy dit. Soetkoekies van soetwyn. Voila! Ek dink selfs ek sal die ene kan bybring!
Binnekort kan die baksters en bakkers begin voorrade opbou vir die groot eet aan die einde van die jaar.
Dellie
Augustus 13, 2008 at 4:27 nm
Dankie Skoor! Dis nogal die eerste keer dat ek hoor van soetwyn in soetkoekies, maar wie is ek nou om te stry? Sal kom verslag doen sodra ek dit gebak het, hoor! 😉
isabel
Augustus 27, 2008 at 12:04 nm
baie dankie. soek al lank na die resep
skoor
Augustus 27, 2008 at 12:13 nm
Isabel, geniet! Die vet storie is vetweet nognie opgelos in my soeke nie, miskien kan jy eendag laat weet.
Rika Esterhuizen
Oktober 6, 2010 at 3:31 nm
Die vet waarvan hulle praat is “lard” of varkvet te koop by slaghuise. My ouma het dit altyd gebruik.
saartjie
November 25, 2008 at 11:23 vm
dit klink heerlik
netjane
November 27, 2008 at 12:34 nm
Ek is so bly jy het hierdie resep geplaas. My blog kry daagliks soekterme wat wissel tussen soetkoekies en outydse soetkoekies tot ouma se soetkoekies. Miskien kom die siele nou hier uit! 😉
Nou wonder net of ek moet begin bak, want ek weet mos nou ek gaan die hele baksel self wil verorber…
Skoor
November 27, 2008 at 4:18 nm
Oe jy kan my niks vertel van Search Engine Terms nie, NetJane! As jy nou die koekies gebak het, dan gaan kyk jy op skoorblok se S.E.T blad wat ek al ondervind het!
En jy is tog so lief vir koekies, ne.
MAGDA
April 3, 2009 at 12:41 nm
LO. DIE VET WAT VARKVET IS INI SOETKOEKIE RESEP KAN VERVANG WORD MET HOLSUM VET. MY MA HET DIT ALTYD SO GEBAK AS SY NIE VARKVET GEHAD HET NIE.
Skoor
April 3, 2009 at 1:30 nm
Great, dankie vir die tip!
Bea-Triche
Augustus 19, 2010 at 9:10 vm
Myns insiens is die vet-botterverhouding verkeerd. Die resultaat lewer ‘n kleinkoekie met ‘n oorweldigende varkvet smaak. Gebruik slegs 2E varkvet en vervang die res met botter of margarien.
Dit is maklik om varkvet self uit te braai:
koop sowat 250g varkspek by die slagter, sny dit in blokkies en plaas in ‘n kastrol gevul met 1 koppie water. Prut stadig by medium hitte totdat die vet alles uitgebraai het. Dit duur so min of meer ‘n halfuur. Die water verdamp vanself.
Syg deur ‘n sif, laat afkoel, bottel en bêre in die yskas. Die uitgebraaide vet hou letterlik maande lank sonder om geur te verloor.
Skoor
Augustus 19, 2010 at 9:17 vm
Dankie vir die raad BT.
Smeer sommer daai varkvet op tuisgebakte brood met dik appelkooskonfyt. Dan gaan dit nie ‘to waste’ nie.
Bea-Triche
Augustus 21, 2010 at 3:32 nm
Plaasbrood met uitgebraaide varkvet , fyngekerfde biltong en taaierige appelkooskonfyt is mos koningskos!
Ek het jou soetkoekieresep aangedurf (minder vet gebruik!) en die eindproduk is heerlik – smaak nes my oorle ouma s’n!.
Dankie vir die resep.
Santjie Strooh
Januarie 28, 2011 at 9:25 nm
Van die vleisirige saksel van varkvet gee n besonderse saak aan soetkoekies.
Alice
Desember 28, 2011 at 3:02 nm
die vet waarvan in die resep gepraat word is Holsum vet. Ek het ‘n resep gehad van soetkoekies maar in plaas van soetwyn kry dit kondensmelk in. ook baie lekker
Skoor
Januarie 30, 2012 at 8:54 vm
BT, ek sal die biltong kerf en konfyt bring, dan bak jy die brood en ons kry mekaar pouse by die draad en eet tot ons MOET rus.
Santjie, dit klink rof, maar ek vat jou woord 🙂
Jissie, vet EN kondensmelk. Ook net ons Boeremense wat so dubbel kan ver-vreet, hahaha
salome
Februarie 4, 2013 at 8:43 nm
dankie vir die resep – ek sou ook moontlik gemmer (1/2 tot 1 teelepel) by die speserye voeg – in die ou dae het my ma altyd skaap stertvet uitgekook en as dit beskikbaar was kon dit miskien gebruik word, alhoewel die uitgebraaide vet was heerlik op brood met appelkoosjam of suiker oorgestrooi, (en die kaiings was ook heerlik om te eet) maar botter of margarine klink baie beter as varkvet in die resep – groete uit Israel
Beulah
Julie 17, 2013 at 6:28 nm
Ek het toevallig gister bietjie vetterige varkvleis gekoop. Ek sny toe die vet af, sny in blokkies in braai bietjie uit. Gister al die kaaiings klaar ge-eet, en sit toevallig nou met sade brood met varkvet en nogal marmelade daarop! Hemels.
Beulah
Julie 17, 2013 at 6:29 nm
Skuus, dankie vir die kleinkoekie resep!
Linda Van Vuuren
Oktober 21, 2013 at 12:12 nm
Sjoe, ek kon uit my vel spring toe ek vandag hierdie resep opgespoor het. Soek al baie lank na hierdie resep. Kan nie wag om te begin bak nie. Maar nou wil ek net weet of ek nou-al kan begin bak vir die kers-koekblikke. Sterkte en nogmaals baie, baie dankie.
Linda Van vuuren
Skoor
Desember 10, 2013 at 8:23 vm
dankie almal vir die kommentare en bydrae hier bo. Deksels, ‘n broodjie met varkvet en gouestroop sou nou sommer vorentoe smaak….
Martie
Januarie 6, 2014 at 1:25 vm
Baie dankie vir die resep – soek dit al baie lank. Ek het my boek op ‘n kol uitgeleen en nooit teruggekry nie 😦 Ons is nou in NZ.
crossforge
Desember 15, 2015 at 9:26 vm
Ek het ‘n soortgelyke resep.
As jy die koekies langer wil hou (dis ‘n groot resep) dan is dit beter om margarien te gebruik in plaas van botter.
Vra by die slaghuis vir vark vet. Hulle het gewoonlik vet wat afval van die karkasse as hulle dit opsny. Dan braai jy dit net uit soos mens kaiings maak and daar is jou vet vir die koekies. Anders braai jy maar ‘n paar vark tjoppies in ‘n pan en hou die uitgebraaide vet wat in die pan agter bly.
OUTYDSE SOETKOEKIES.
Bestandele:
750g botter.
2,5 kg koekmeel.
1,25ml fyn neutmuskaat.
60ml fyn amandels.
5ml fyn gemmer.
5ml gemengde speserye.
8 eiers geklits.
15ml varkvet.
7 koppies geel suiker.
5ml droë gerasperde nartjie skil.
5ml fyn kaneel.
5ml fyn naeltjies.
Sout.
250ml rooi soetwyn.
15ml koeksoda opgelos in 15ml asyn.
15ml vlugsout opgelos in 15ml melk.
Metode:
Stel die oond op 180C. Smelt die botter en vet saam. Meng al die droë bestandele saam en voeg die gesmelte botter, koeksoda en vlugsout by. Voeg die eiers en soetwyn by en meng goed. Rol die deeg uit en druk koekies met ‘n koek drukker uit. Bak op ‘n gesmeerde bak plaat tot net bruin.
Naomi
Oktober 29, 2018 at 11:37 vm
Dit is ook my resep. Lemoenskil maak verskil