RSS

Die Wosonkies se Pot Roast

14 Aug

Jaco, jy kry die naweek ‘n lekker stuk vleis.  En as jy jou gedra, groente daarby!

Ek het ‘n vreeslike heerlikheid in die vorm van ‘n platboom swartpot gekry.  Ma erf by ouma, ek erf by ma.  Daar is nog een pot wat ek eye, maar as ek gaan kuier, word die pot sommer in die klerekas toegesluit.

In hierdie pot van my, is, en word steeds heerlikheide opgetower.  Maar as jy nie so ‘n swartpot het nie, onthou, waar daar ‘n wil is, is daar ‘n weg!

As jy die stuk vleis identifiseer en aangekoop het, marineer hom sommer dadelik.  Gooi in jou vysel en stamper, ‘n lekker skeut growwe sout, ‘n paar peperkorrels, suurlemoensap van een suurlemoen, ‘n knoffelhuisie (twee as hulle effe klein is) en ‘n paar takkies vars roosmaryn.  As joune deur die winter gevrek het, gebruik dan maar die gedroogde soort.  So ‘n teelepel vol.  Gedroogde kruie is meer gekonsentreerd as varses.

Maak die mengsel lekker fyn, en gooi so ‘n halfkoppie olyfolie by, meng deur, en vrywe die stukkie bees asof dit sy laaste vryf is (en dit is!)  Nou kan hy oornag in die yskas le met ‘n draai so al om die 4 ure, of ten minste vir 2 ure as jy haastig is.

Voorverhit jou oond na 200 grade celcius.  Sit die vleis in ‘n oond roosterbak, met die res van die sousies.  Los daar vir ‘n uur en kry die groente reg.

Ek het ‘n Steam Supreme, en glo dat daai groente net anders smaak.  As jy nie dit het nie, kook ‘n aartappel of 3 en ‘n paar wortels, ‘n handvol beetknolle en ‘n groot, heel ui in water.  Miskien moet jy die beet apart kook, anders het jy pienk aartappels, bruin wortels en ‘n vleeskleur ui.

As die groente amper gaar is, dreineer en sny in kwarte.  Maak 2 huisies knoffel skoon en sny ook in kwarte.

Sprinkel olyfolie oor groente, en sprinkel seesout oor.  Op hierdie stadium kan jy ook rou knopie sampioene en ‘n paar groenbone byvoeg.  Of ‘n murgpampoentjie, in die lengte deurgesny. 

Na die uur van kook verby is, haal die vleis uit die oond, gooi die groente rondom die vleis in die oondskottel, en sit terug in die oond vir nog 30 minute.  Sorg egter dat die groente so warm moontlik by die vleis gevoeg word, sodat die kookproses net kan aangaan. 

Na 30 minute behoort ‘n stuk vleis van tussen 5-6kg, meer spesifiek ‘n ‘rib of beef’ (met bene) medium gaar te wees.  Hou dit langer in die oond indien jy dit gaarder wil he.  Hou tog net die groente dop en keer dat dit verbrand.  ‘n Termometer wat jy in die vleis druk om die mate van gaarheid te bepaal, is nogal ‘n aanwins as mens baie met groot stukke vleis werk.  Kyk by spesialiteitswinkels wat kombuisware verkoop daarvoor – dis nie so duur nie.

Haal die vleis uit die oondskottel, draai dit toe in foelie, en laat rus vir 20 minute.  Verwyder die groente en hou eenkant warm.  Ek druk dit sommer weer terug in die oond, toegemaak met tinfoelie.

Dis nou ook op hierdie punt dat die liefling die tafel moet dek, en die wyn moet oopmaak – gebruik die wyn wat jy gaan drink om mee te kook.  Druk die borde ook in die afgeskakelde oond om hitte op te bou.  Koue borde maak kos gou koud en onsmaaklik.

Sit die oondskottel met die kooksousies op die stoof, skakel die plaat aan, en gooi ‘n halfkoppie rooiwyn in die skottel, tesame met die ui wat vroeger gekook is, en die knoffel wat saam met die groente ingesit is.  Druk die ui en knoffel fyn met ‘n vurk en bring die sous tot kookpunt.  Die alkohol moet verdamp, en met ‘n houtlepel skraap jy al die lekker brandseltjies los van die boom van die skottel, en wag dat die sous verdik.

Weereens span jy vir lief in om die vleis te sny en op ‘n mooi bord te sit, en rangskik die groentes daarom.  ‘n Gereg vir ou liefdes – die tyd van beindruk is verby.  Hierdie is kos vir saam-oudword-eters.

Sit voor met ‘n goeie glasie rooiwyn, en geniet mekaar se geselskap.

 
3 Kommentaar

Posted by op Augustus 14, 2008 in Lekker maklike kos

 

3 responses to “Die Wosonkies se Pot Roast

  1. maxie

    Augustus 17, 2008 at 7:39 nm

    Dankie vir die resepte Skoor! Dit lees altyd lekker. Ek het jou hoendervlerkies probeer, is hemels.. Doen so voort.

     
  2. skoor

    Augustus 18, 2008 at 10:26 vm

    Dankie vir die inloer Maxie – en die terugvoer. Geniet die lees- en kookreis!

     
  3. Krista

    Augustus 19, 2008 at 5:38 nm

    Thanx Skorie, ek maak notas! Met ons volgende rooivleis-ete doen ek difinitief die ding!

     

Lewer kommentaar

Verskaf jou besonderhede hieronder of klik op 'n logo om in te teken:

WordPress.com Logo

Jy lewer kommentaar met jou rekening by WordPress.com. Log Out / Change )

Twitter picture

Jy lewer kommentaar met jou rekening by Twitter. Log Out / Change )

Facebook photo

Jy lewer kommentaar met jou rekening by Facebook. Log Out / Change )

Google+ photo

Jy lewer kommentaar met jou rekening by Google+. Log Out / Change )

Connecting to %s

 
%d bloggers like this: