Tannie AnnaUys se beskuit

As die dae begin korter raak, en die veld is nat in die oggend as jy gaan stap, dan begin die nostalgie ook hiberneer in jou binneste (jy moet bo 35 wees om dit ten volle te kan beleef)

Dan onthou jy die warm somers, en die koel Oros binne-in ‘n huis waar die gordyne getrek was om die ellendige hitte net bietjie teen die bors te stuit voor die gordyne weer teen laatmiddag oopgetrek is, om die baldadige agtermiddag in te nooi.

So ‘n huis was tannie AnnaUys se huis in Paul Krugerstraat, Stellenbosch.  Maar by Oros het dit nie gebly nie.  Sy het nogal reageer op ‘n altyd-honger skoolkind se blik na die blik op die kas (ma het ons geleer om NOOIT te vra nie, en ons het wragtag ook nie, maar die oe kon nie lieg nie)

Dan haal sy daardie vaal, lang blik (vroegere jare se roomys blik, so is ek maak verstaan) van die kas af, en ordentlik geleerde stadige bewegings handjies glip in die blik om ‘n beskuit uit te lig en met die Oros te geniet.  En ‘n tweede, en ‘n derde.  Tannie AnnaUys het ons maar laat begaan.  En daar was altyd van daai beskuit in die huis.  Nee dankie vir koekies, koek, tert.  Asseblief vir die beskuit.

‘n Tyd gelede begin ek soek na tannie AnnaUys se beskuit resep.  Almal van daai generasie is al oorlede, en ek kom met ‘n ompad by die resep uit.  Ek kry dit van ver oorsee waar dit teen die hart van ‘n kind van die ma, veilig gehou is.

Dankie vir die deel daarvan.  Die wat tannie AnnaUys kan onthou, en ooit die resep wou kry – hier’s hy.  Al smaak dit nottehel soos hoe sy dit gebak het.  Ek het nie dieselfde geduld en liefde in my hande nie.  Maar ek probeer!

ALL BRAN BESKUIT

Trek ‘n kom nader – moenie hier kom lol met klein mengbakkies nie, jy GAAN mors en vies raak.  Keer ‘n 1kg pak bruismeel in die kom om, en gooi toe met 300g All Bran Flakes.

Sprinkel 1eetlepel bakpoeier oor die All bran, en ‘n teelepel sout.

Roer die spul deurmekaar en hark nog ‘n bak nader wat in die mikrogolf kan pas.  Smelt 500g botter in die bak, en laat afkoel.  Klits 3 eiers, 250g suiker en 750ml karringmelk bymekaar.  Voeg die botter by die eiers, suiker en karringmelk en roer.

Gooi nat by droog en meng goed deur met ‘n sterk houtlepel.  Ja, jou arms gaan lam raak.  Roer!  As die mengsel te droog is, gooi die res van die karringmelk (jy het mos 2 x 500ml houertjies gekoop?) bietjie vir bietjie by.

Spuit of smeer broodpanne.  Ek het 3 pannetjies gevul met my mengsel.

Druk in die oond wat jy aan die BEGIN van die resep al moes aangeskakel het (ja!) en bak vir 45minute tot 60minute.  Druk ‘n bamboes stokkie daarin.  As hy skoon uitkom, is die beskuit gaar.  Moenie ‘n sushi stok indruk nie.  Dit sal lyk of ‘n mol deur jou beskuit is.  Sosatie stokkie werk die beste.

Keer op ‘n draadrak uit en laat afkoel.  Moenie nuuskierig soos ek wees en begin sny as die brode nog half warm is nie…dit gaan breek.

Pak op die oondrakke, en droog oornag uit.

Laat afkoel, vul jou grend beskuitblikke, en STOFSUIG DIE OOND voor jy more lasagne bak en die krummels vlam vat of jou kos na brand laat smaak!